Cyfeillion Parc Bute
Hysbysiad Pwysig
Mae Grŵp Cyfeillion Parc Bute wrthi’n cael ei ail-lunio a'i adfywio gan bwyllgor bach ac mae’n chwilio am aelodau newydd i ymuno â’r grŵp.
Os hoffech gymryd rhan yng Ngrŵp Cyfeillion Parc Bute, e-bostiwch paul.barrett@newfriendsofbutepark.co.uk / ian.body@newfriendsofbutepark.co.uk
Mae Cyfeillion Parc Bute yn frwd dros wella’r parc a’i gadw’n arbennig.
Mae’r Cyfeillion yn gweithio’n agos gyda Thîm Parc Bute i wneud y canlynol:
- cynnal gwaith cadwraeth,
- trefnu sesiynau casglu sbwriel,
- labelu coed a
- chael gwared ar blanhigion goresgynnol megis y ffromlys chwarennog.
Er mwyn hyrwyddo nodweddion naturiol a hanesyddol y parc, mae’r Cyfeillion hefyd yn trefnu:
- teithiau cerdded,
- teithiau cerdded yn y byd natur,
- gweithgareddau gwylio adar ac
- arolygon bywyd gwyllt.
Er mwyn cynrychioli defnyddwyr y parc, mae grŵp y Cyfeillion yn:
- rhoi adborth am syniadau a mentrau newydd,
- cynnig cyngor ac yn rhoi safbwynt defnyddwyr y parc i’r Cyngor, ac yn
- cwrdd yn rheolaidd i drafod a chefnogi gwaith cynnal a chadw’r parc a chynllun rheoli’r parc.
Os hoffech chi wybod mwy am y grŵp, e-bostiwch parcbute@caerdydd.gov.uk
Hefyd mae gan y Cyfeillion hysbysfwrdd a blwch post yng Nghaffi’r Ardd Gudd.
Cyfansoddiad Cyfeillion Parc Bute
Diben grŵp y Cyfeillion fel a nodir yn eu cyfansoddiad yw:
- Dathlu amgylchedd, bywyd gwyllt a hanes Parc Bute.
- Diogelu, cadw a gwella Parc Bute fel lle rhyddid, hamdden a phleser diogel er lles hirdymor pob rhan o’r gymuned.
- Hyrwyddo Parc Bute i’r gymuned leol ac ehangach.
- Cynyddu, diogelu a hyrwyddo bioamrywiaeth Parc Bute.
- Gweithio mewn partneriaeth i gyflawni’r amcanion hyn â Chyngor Sir Caerdydd, cyrff statudol a grwpiau gwirfoddol.
- Cyfeirio a cheisio barn pobl leol a grwpiau cynrychioliadol fel y gall y parc gwasanaethu’r gymuned leol yn y ffordd orau bosibl.
- Sicrhau bod camau gweithredu’r Cyfeillion yn gyson â chynllun Cyngor Sir Caerdydd ar gyfer cynnal a chadw a rheoli’r parc.
